YUTA UG HUSTISYA ALANG SA MGA MAG-UUMA!
Karong adlawa ang ika-23 ka tuig nga kasumaran sa Mendiola Massacre nga mikutlo sa kinabuhi sa 13 ka mag-uuma. Hangtud karon walay nakab-ot nga hustisya ang mga biktima ug inay gipagrabe pa sa pasistang atake sa rehimeng Arroyo han-ay sa mga mag-uuma ug gipalawig pa ang pagpatuman sa kontra mag-uuma nga CARP.
Sa paghandum sa Mendiola Massacre sa katapusang tuig ni Gloria mihugop sa kaulohan ang liboan ka mag-uuma gikan sa Luzon, Visayas ug Mindanao nga mipahigayon sa nasudnong lakbayan (taas nga martsa ug caravan) -diin gilatas nila ang liboan ka kilometro - aron hiniusang ipalanog ang panawagan alang sa tinuod nga reporma sa yuta ug katilingbanong hustisya.
Kini taliwala nagkagrabeng suliran sa yuta ug kuyanap nga pagpangyatak sa tawhanong katungod sa gobyernong Arroyo. Bisan sa iyang pagpalawig ug pag-”reporma” sa mini nga Comprehensive Agrarian Reform Program (CARP), pabiling 7 sa 10 ka mag-uuma ang saop ug walay gipanag-iyang yuta.
Samtang moabot sa 562 ka mag-uuma ang nabiktima sa extra-judicial killings diin 129 nila mga lider mag-uuma.
Sobra na duha ka dekada ang pag-antos sa mga mag-uuma ubos sa CARP, nga dugoong legasiya sa administrasyong Aquino. Dili na kini angayang ipadayon bisan usa ka minuto man lang. Ang mosunod nga administrasyon human sa piniliay kinahanglang amgo sa maong katilingbanong reyalidad.
Ang militaristang kagamhanang Arroyo kinahanglang hatagan sa kinutoban diha sa pagpakyas sa iyang laraw nga magpabilin sa gahum lampas 2010. Mahimo kini sa hiniusang kusog sa katawhan sa kadalanan ug natarang elektoral. ###
Gipagawas sa:
Kilusang Magbubukid ng Pilipinas-Cebu (KMP-Cebu)
